Ish-kryeministri: Qeveria shkeli Kushtetutën, Kosova nuk është shtet i diktaturës

Ish-kryeministri Ramush Haradinaj tha se qeveria e udhëhequr nga Albin Kurti me vendimin për kufizimin e lëvizjes së qytetarëve derisa vendi nuk ka të shpallur gjendjen e jashtëzakonshme shkeli rënd Kushtetutën.

Nëpërmjet një shkrimi në Facebook, Haradinaj tha se tendenca e tilla të shfrytëzimit të krizave për kontrollë janë veprime për diktaturë.

Shkrimi i plotë i Haradinajt në Facebook:

Vendimi i Qeverisë për të ndaluar lirinë e lëvizjes njëanshmërisht është shkelje e rëndë e frymës së Kushtetutës dhe sistemit të balancimit dhe kontrollit!

Edhe në kohë krizash gjëja më e çmueshme e shtetit është demokracia dhe Kushtetuta. Çdo tendencë si kjo e sotshmja që krizat të shfrytëzohen për vendime të njëanshme për të vendosur kontroll, është veprim për diktaturë.

Kosova nuk është shtet i diktaturës por i frymës së demokracisë.